報道？報導？

【明報專訊】政府早年擬修訂《版權條例》，被網民謔稱係「網絡23條」，最終修訂唔成功，新一屆立法會再審議《2022年版權（修訂）條例草案》，相關委員會噚日完成逐條審議工作，目標喺12月7日提交立法會大會恢復二讀。對於條文嘅內容，議員都無乜大意見，不過選委會界別議員管浩鳴質疑《條例》將「報導」改為「報道」嘅原因，話見到好多電視台都用前者，而法例需要畀公眾睇，擔心大家睇唔睇得明喎！

管憂公眾睇唔明

律政司代表解釋，2014年修訂相關條例時已討論過用字問題，官員引述當時文件提到，「報道」嘅「道」字比較中性，而「導」或有引導意思，而教育局發出嘅《香港小學學習詞表》所收錄嘅係「報道」，所以喺《條例》用「報道」。科技創新界議員邱達根其後亦質疑，係咪其他法例都要改為「報道」，又反問政府代表，《條例》中嘅「複製品」係咪應改為「複制品」，因為𠵱家已唔只係「造衫」。

委員會主席馬逢國就話，政府草擬《條例》時已考究過用字，覺得無必要喺會上再討論，又相信未來遇到類似中文問題，律政部門係會處理。